GD夜蒲釀衝突韓國保鑣出手打人

GD夜蒲釀衝突 韓國保鑣出手打人

韓國當紅組合BIGBANG隊長G-DRAGON（GD），一連兩晚喺亞洲博覽館舉行演唱會已完成。噚晚完騷後，GD未有返酒店休息，反而轉到蘭桂坊夜蒲，當然佢班粉絲亦步亦趨跟到實。凌晨一點十五分，韓國組合Epik High先行到Dragon-i耍樂，及後GD同鍾欣桐男友K先生到場，不過兩人未有落車。

GD魅力爆燈令歌迷Crazy，就連佢嗰三位韓國貼身保鑣，亦突然變得「瘋狂」，當佢哋見到記者影相時，好似如臨大敵咁，不但用電筒照住記者鏡頭，甚至「講手」，有記者仲被保鑣擊中面部。呢個時候，十幾名為歌迷揸車嘅租車司機亦現身，要求韓國保鑣道歉，佢哋聲稱曾遭韓國保鏢不禮貌對待。

現場有工作人員大叫：「你哋（記者）唔好再影，唔係佢(GD)唔落車﹗」而班GD粉絲就擔心見唔到偶像一面，群情洶湧喪叫記者唔好影相，之後班粉絲又「講手」，拉扯記者嘅帽同褲，場面混亂，事件擾攘咗15分鐘，GD先踎低，再衝入升降機避鏡頭。會唔會誇咗啲呢？

其實韓國保鑣出手打記者已有前科，今年三月韓國組合JYJ成員Hero，單拖來港開騷，當日現場有逾百粉絲聚集，張栢芝胞弟張柏文負責接送Hero，仲安排咗八名南亞裔保鑣及四部房車迎接Hero。有粉絲扮記者混入採訪區，場面混亂。期間Hero突然現身，所有人即上前拍照，Hero身旁三名韓國保鑣，有人表現粗魯，竟將記者撞向垃圾桶，認真離譜。

Epik High想見謝霆鋒

擔任G-DRAGON港騷嘉賓的韓國實力派組合Epik High，前日演出前接受本報訪問。問成員Tablo是否仍有與昔日在加拿大一起讀書的謝霆鋒聯絡，Tablo說：「我有聽他的歌，他返了香港後少了聯絡。不過他和張東健拍戲時，有託張東健向我問好，希望他看到這個訪問後找我。」組合去年底來港參加MAMA頒獎禮時吃了四次避風塘炒辣蟹，希望今次可以再吃。